有消息指政府月內將發信予區議員要求完成宣誓，不獲信件者等同被褫奪議席（DQ）；亦有消息指，邀請區議員宣誓嘅信件將會於下周一前發出，隨後有幾日緩衝期，預料今個月內無法舉行宣誓儀式，或延遲至下月初舉行。民政事務局局長徐英偉尋日出席立法會大會時，就對有關宣誓安排三緘其口，僅指若有細節會再公布。
徐英偉話，宣誓方面未有新安排可公布，一有安排細節會喺適當時候，再對外宣布。至於宣誓能否趕及今個月舉行，定係下月呢？徐都係話到時再講。
就傳聞指，若區議員喺宣誓後被DQ，政府將追討其上任以來嘅薪津。本身係律師嘅議員謝偉俊認為，此舉有機會引致法律訴訟。佢以立法會議員上任後被DQ為例，指議員若被立法會主席及秘書長接納其宣誓，其後使用薪津聘請員工，後來若被追討上任以來嘅薪津，原告人或因被誤導以致出現損失。所以之前有幾位立法會議員被褫奪資格時，都採取和解方案，以免招致法律訴訟嘅風險。不過，佢強調區議會屬於另一個架構，有關例子是否同樣適用於區議會就有待考證。