政情：律師會理事改選在即 候選人斥社會太政治化
香港律師會8月舉行周年大會，屆時將改選5名最資深理事。5名「專業派」律師黃巧欣、陳國豪、傅嘉綿、袁凱英、岑君毅尋日宣布參與下月嘅律師會理事會選舉。呢5位候選人都認為現時社會過於政治化，希望企出嚟團結業界維護法治，同埋維持律師專業。
黃巧欣指香港過去3年面對史無前例嘅挑戰，如果律師連專業都未能維護，又何來尊嚴呢？黃話理事會有20位理事，各人持不同意見實屬正常，但終須維持專業同中立，先至可以為大眾分析社會議題，反問若將政治元素帶入律師會，律師如何再取得大眾嘅信任？被問到是否理事會內嘅「開明派」令業界過於政治化？黃回應話「開明派」只係社會上嘅標籤，認為理事同會員從來都係專業嘅律師。至於另一位候選人傅嘉綿就話，因關注社會議題所以希望加入理事會。