政情：郭榮鏗贈興2.0 祝在囚郭家麒生日平安
一子錯，滿盤皆落索。有47名泛民主派人士因為發起或參與去年民主派「35+」初選，涉嫌違反《港區國安法》，被控串謀顛覆國家政權罪。前公民黨（公文袋）議員楊岳橋同埋郭家麒（KK）目前仍被羈押。不過，佢哋嘅前黨友郭榮鏗就比較好彩，舊年11月已經遠走加拿大。可能佢要表現得仍然掛念手足之情，繼上個月為楊岳橋隔空送上生日祝福後，今次輪到郭家麒有此榮幸喇。
郭榮鏗尋日喺社交網站分享同KK嘅昔日合照，望落係由另一前黨友陳淑莊辭任議員當日嘅大合照剪裁而嚟嘅。郭榮鏗嘅貼文可謂簡而精，佢提到KK對佢而言係一個政壇路上嘅前輩同埋好夥伴，話兩人之間不必多言，心照一生，祝願佢生日平安，最後仲加個「兄弟撐住」標籤添。
早赴加國遠走高飛
唔知郭榮鏗係攞景定贈興呢，自己一早同家人遠走高飛，回到「家鄉」加拿大。之但係KK又點會平安呢，佢因為泛民「35+」初選案至今已經還押近5個月，牢獄生涯可謂遙遙無期啊。