政情：去年6‧4非法集結囚4個月 前區議員梁凱晴放監
觀塘區前區議員梁凱晴因出席去年6‧4集會而被控參與未經批准集結，早前認罪並遭判處入獄4個月，並因判囚失區議員資格。佢尋日終於服刑完畢，不過粒聲唔出就登上的士，絕塵而去。
粒聲唔出飛的走
梁凱晴喺今年4月開始服刑，扣除假期後，尋日刑滿出獄。佢喺早上9時10分離開羅湖懲教所，有幾名親友到場迎接，包括觀塘區前區議會主席蔡澤鴻。梁喺親友陪同下登上的士離開，全程緘口不言。
現年26歲嘅梁凱晴喺2019年區選出戰觀塘月華選區，以2,969票當選。梁同埋壹傳媒黎智英等26人，被指參與或煽惑他人參與去年6月4日喺維園舉行嘅未經批准集結而被起訴，該案其中4名被告黃之鋒、岑敖暉、袁嘉蔚及梁凱晴早前承認一項參與未經批准集結罪，黃之鋒被判入獄10個月、岑敖暉判囚6個月、袁嘉蔚同梁凱晴均判入獄4個月，梁亦因判囚失去區議員資格。