政情：陳健民靜雞雞赴台 恐又教壞細路
因2014年發起「佔中」，前年需入獄「找數」嘅中文大學社會學系前副教授陳健民，自去年刑滿出獄後言行都比較低調。尋日台灣國立政治大學社會學系系主任黃厚銘透過社交平台宣布，原來陳前日已抵達台灣，並將以台灣政治大學社會學系訪問教授嘅身份授課。而陳就話會繼續寫書同埋更新佢喺網上頻道嘅節目，又話希望一年後喺香港「再見」喎。對於陳「靜雞雞」咁離港赴台，有議員就質疑佢咁做到底對唔對得住香港嘅支持者，同埋去到台灣會唔會向當地年輕人鼓吹「違法達義」喎。
點解會不辭而別？陳健民解釋話一年前喺獄中已收到邀請，但礙於疫情，幾日前先攞到簽證，過去幾日則忙於執拾同處理防疫事宜，所以無法安排告別聚會。陳表示會喺台灣教授社會運動及當代中國，課堂上佢會鋪陳唔同意見與角度，期望可以同學生有更多交流，但佢就會避談個人政見，又話呢兩科都係比較敏感嘅科目，都驚會觸及《港區國安法》，畢竟法例邊界模糊，難以界定。陳提到喺香港經常要去探監，加上政治環境影響心情，難以集中精神寫作，所以逗留台灣期間避免出席太多公開活動，希望可以閉關寫一本敍述及反思佔中運動嘅書籍咁話。
話希望一年後回港
同樣因佔中案被裁定串謀犯公眾妨擾等罪成嘅香港大學法律系前副教授戴耀廷就無咁好彩喇，戴喺上訴期間被撤銷保釋，而需繼續就該案服刑。戴耀廷同時亦因涉違國安法嘅上年民主派「35+」初選案，被控「串謀顛覆國家政權罪」，如果一旦判刑，都唔知幾時可以重見天日喇。
雖然陳健民表示希望一年後喺香港再見，不過議員郭偉强就認為陳只係「戴定頭盔」嘅講法，因為唔肯定會唔會回港。郭批評陳當年所鼓吹嘅「違法達義」，唔少學者同埋法官都認為係一個非常危險嘅主張，可謂不負責任咁「推人去死」，批評陳到今日依然故我。郭又批評陳話走就走，到埗先至通知，反問佢對唔對得住香港嘅支持者，又叫大家估吓台灣嚟緊出現大型騷亂嘅機會有幾大，又質疑陳去到台灣會唔會繼續鼓吹年輕人「違法達義」喎。