政情：提供學習津貼高球訓練 林建岳：助基層童追求目標

香港哥爾夫球會主席林建岳指球會將於計劃首年投入300萬元，翌年再捐出312萬元，合共612萬港元為基層兒童提供學習上同經濟上嘅支持，期望可以透過計劃接觸到更多有需要嘅家庭，並鼓勵基層兒童追求個人目標。

送平板電腦 支援學習

樂群執行委員會主席吳秋北話自疫情以來，大部分學童只可以喺屋企線上學習，對於基層學童嚟講，因缺乏電腦同上網設備，令學習更加困難，而球會為學童提供200部平板電腦同數據卡，呢個計劃亦會為合資格嘅學童提供現金津貼，同埋幫助一班有特殊學習需要嘅學童。

同場嘅民政事務局局長徐英偉就話自己都有兩個小朋友，認為父母陪伴對兒童非常重要，而呢個活動既可讓小朋友學習高球技巧，又能有更多親子活動時間。

呢個為期兩年嘅計劃將每年提供220個名額，為低收入家庭的學童提供現金津貼，令佢哋可參加補習班或課外興趣班，亦已向佢哋提供平板電腦同流動數據卡，支援佢哋嘅學習需要。此外，香港哥爾夫球會喺同期將提供2,000人次嘅高球體驗，仲會喺參與活動嘅學童中揀選40人實行進階培訓課程，以物色高球新血。