政情：兩乖孫書展探班 田北辰放閃
唔少政界名人都會趁書展推出新書或唔同活動，其中議員田北辰（田二少）日前去書展出席活動時，就話有兩個乖孫嚟探班可以「放閃」，雖然冇「大叔的愛」，但就自言「金鐘『田田』有孫女的愛」。至於議員麥美娟（Alice）亦有去書展，支持所屬政黨成員推出嘅新書，更趁機斥近年有罷工並非爭取勞工權益，而係出於政治目的。
田二少尋日喺Facebook貼文，話喺書展見到好多爸爸媽媽陪小朋友揀書，感覺好溫馨，最估唔到係自己都有份放閃喎。原來係兩個乖孫嚟咗探班，仲左右護法咁傍住佢幫其他小朋友簽書，笑指「即刻能量值Max」。佢話雖然無人同佢講「田田 I love you」，但有「公公 I love you」就心足啦喎。
麥美娟斥近年罷工含政治目的
另外，Alice同黨友、議員陸頌雄尋日都去咗書展撐場，其中Alice就批評近年嘅罷工運動唔係單純為咗勞工，而係可能已經滲透咗政治目的或者有圖謀，同佢哋工會為咗爭取工人福祉，而發起嘅罷工行動不可同日而語。