政情：尹兆堅醫汗癬 靠一張濕紙巾
因去年參與民主派「35+」初選，涉違反《港區國安法》，被控串謀顛覆國家政權罪嘅前議員尹兆堅（肥尹），早前傳出佢喺獄中患上汗癬，雖按醫生指示搽藥膏，但炎熱天氣又令佢不斷抹汗，都可謂苦不堪言。前議員邵家臻尋日去探望肥尹，發覺佢身上嘅汗癬竟然好番晒，到底肥尹用咗乜嘢良方妙藥呢？
其實肥尹治療汗癬嘅方法好簡單，先用清水洗淨患處然後抹乾，跟住再用消毒濕紙巾輕抹患處消毒，繼而塗上藥膏，唔駛3日就會痊愈，不過要留意呢個方法有其竅妙之處，就係必定要用某品牌嘅消毒濕紙巾先至達到效果咁話。
鐵窗內健身度日
解決汗癬困擾，肥尹嘅注意力就轉移到減肥同健身。邵家臻話肥尹依家每日狂做運動，掌上壓同深蹲都係必做嘅動作，又話以前健身教練傳授嘅鍛煉動作，鐵窗之下再派用場。之不過，雖然肥尹係有所清減，但係面上嘅Baby fat仍然去得好慢囉。