政情：陳茂波張宇人撐枱腳 食住燒賣宣傳消費券

財政司司長陳茂波（波叔）頻頻落區，為電子消費券賣廣告。繼上次幫市民登記消費券，撞到一位唔識電腦嘅女士，即係議員麥美娟。今次落區又有彩蛋，同另一位議員一齊歎茶喎。
陳茂波（右）同張宇人（左）兩位大叔去飲茶，宣傳消費券計劃。
陳茂波（右）同張宇人（左）兩位大叔去飲茶，宣傳消費券計劃。

財爺尋日喺社交網站分享，話消費券計劃開展兩星期，已經接近600萬人登記，可見大家都好期待使用消費券啊！佢尋日朝早去到香港仔一間茶樓，有市民一家大細同佢開心合照，仲有長者對佢豎起手指公讚好！

幫對方活動賣廣告

波叔話今次係約咗另一位大叔，一壺普洱、兩個大叔、三盅點心。原來個大叔係飲食界議員張宇人，財爺不忘幫張嘅七月七折活動賣廣告，鼓勵大家搵多幾個朋友、嗌多幾籠點心，齊齊消費、帶旺經濟！

波叔（中）喺茶樓同市民傾計。
  • 波叔（中）喺茶樓同市民傾計。