政情：起底刑事化 陳健波拍心口 立法才保自由

波哥早前透過社交平台痛斥起底行為猖獗，並造成社會上一股歪風。佢話公開他人嘅姓名、住址、電話、身份證以至家人、小朋友嘅資料，會令受害人蒙受巨大心理及財務損失風險，更有人身安全威脅，而且資料一旦上網，根本無法完全移除，影響可以係終身。

公開大人私隱 細路被欺凌

況且喺起底嘅陰影籠罩下，若果唔想自己同家人嘅私隱被公諸於世，以致出現大人被盜用身份證借錢、小朋友被欺凌嘅可怕後果，結果就惟有選擇噤聲，因此起底絕對係一種反言論自由嘅行為、係可恥嘅恐嚇。就算個人私隱專員公署跟進投訴，但礙於現時法例所限，能夠做嘅選項唔多，雖則會聯絡相關嘅平台或討論區，但當中有三成內容未能移除。

澳紐早已立法 修例不容緩

至於早前有報道指，多間互聯網企業憂慮修例影響而考慮撤出香港市場，不過後來就澄清話只係致函港府表達業界關注。波哥就話有關修訂因處於草擬階段，相關企業未了解條例嘅涵蓋範圍，擔心要負上刑責其實係可以理解，但佢認為港府只要清晰列明起底行為及意圖，同埋參考外國準則，相信有關企業了解之後，應該唔會撤出香港。

此外，個人資料私隱專員鍾麗玲尋日出席電台節目時，同樣指出起底行為近年屢屢發生，部分案件更涉及幾歲小朋友，已觸犯道德同法律底線。鍾強調立法打擊起底行為，喺國際間並非新鮮事，新加坡、澳洲、新西蘭等早已立法，而根據私隱公署委託香港大學進行嘅調查，結果顯示有約三分之二受訪者都支持加大私隱公署權力以遏止起底。鍾相信政府喺制訂草案時，已平衡保障個人私隱同言論自由。