政情：清潔龍尷尬rap大賽 惡搞成真
清潔龍阿德作為食物環境衞生署嘅吉祥物兼虛擬大使，成日都冇厘正經。早前喺4月1日愚人節當日，公開邀請市民錄低關於清潔嘅尷尬演奏，以參加「阿德尷尬饒舌大激鬥」，雖然當時佢強調呢個比賽「珍珠都冇咁真」，但好多市民都認為清潔龍只係單純玩惡搞，點知事隔幾個月竟然舉辦頒獎禮啊！
舉行真頒獎禮 作品擺上網
清潔龍尋日喺社交網站發文，話早前成功吸引唔少參賽者。佢仲自詡有口齒，講得出做得到，只要符合「令佢睇完條片尷尬到抖唔到氣」呢個條件，就會喺芸芸眾多嘅參賽者之中揀選最尷尬嘅3位，邀請佢哋去清潔龍總部同佢合照，仲送出阿德清潔概念大碟畀佢哋添，話頒獎嗰吓都好尷尬啊！
清潔龍又老實不客氣，將得獎者嘅作品放上網畀大家一齊欣賞，但見得獎者睇番自己嘅饒舌演奏都忍俊不禁，場面又真係幾尷尬喎。