政情：旅業冰封 陳智遠竟逆市請人
疫情對旅遊業造成致命衝擊，日前就有政府官員話，正考慮幫一啲冰封行業嘅從業員轉行，事關政府難以連續幾年支援旅遊業。離開政府後投身文化深度遊嘅食物及衞生局前政治助理陳智遠，都對行業巿道不表樂觀，但日前佢又透過社交平台招聘人手喎，點解會咁勇呢？
希望幫得就幫
陳智遠話，唔少人都關心佢盤生意捱唔捱得過，感覺猶如彌留中嘅病人。而實情喺舊年還過得去，細公司托賴唔使炒人，不過就見到市況一片愁雲慘霧，一批又一批市民加入失業大軍，於是就諗吓係咪可以做啲嘢，幫得幾多得幾多。佢話公司已經請咗兩位同事，但後來計過度過，仍然有能力喺呢個艱難嘅時期，請多一兩個人，尤其係有5至10年經驗嘅同事，分擔一啲項目管理同業務發展嘅工作。
陳智遠又有感而發咁話，要令香港成為一流嘅旅遊城市，就要有一套方法令人走進生活日常，並且被當地嘅人和事所感動。當中係需要苦心經營、努力探索、同致力保護。如果一方面冇耐心，或懶得付出去找尋呢套方法，另一方面又吹噓旅遊業可重新出發、香港會成為一流旅遊城市，基本上，都只係一堆廢話。