政情：趁電子消費券契機 縮長者數碼鴻溝
電子消費券成為全城熱話，議員陸頌雄（Michael）就延伸想法，提到電子支付只係眾多資訊科技應用嘅其中一個環節，希望透過今次機會令長者更普遍使用手機應用程式。Michael仲點名話例如「安心出行」及「智方便」等政府提供嘅應用程式少人使用，睇嚟主事官員要正視問題喇。
安心出行智方便少人用
Michael憂慮一眾老友記會有數碼鴻溝，當中分為接入鴻溝以及使用鴻溝。前者係指部分市民買唔起手機，包括無力負擔流動數據、Wi-Fi等成本。使用鴻溝就係指買完手機之後，到底識唔識得使用呢？Michael話使用鴻溝問題喺長者間相當普遍，留意到長者好少使用政府應用程式，例如「安心出行」及「智方便」等。佢促請政府提供更多政策配套，同時推動應用程式開發商，開發更多便利長者使用嘅程式介面，例如放大字體、簡化功能等。
另外，當然唔少得投放資源教育長者喇。Michael寄望政府加大力度鼓勵老友記學習，喺社區上做到長幼共融，喺老友記之間亦可以互相分享同學習呀。