笑看天下:關注民生 先搞好衞生

香港經過黑暴、年半疫情持續,百業凋敝,經濟看來並非短期內可以復甦,隨着最快下月一日可以有首期政府派發嘅2,000蚊電子消費券,老朽都希望如財爺所言,大家「齊齊消費,帶旺經濟」!

呢,一項調查話畀大家知,大眾市民最熱門嘅瀏覽數據,分別係交通、天氣、經濟、醫療衞生和人口,要言之,亦即係民生攸關嘅「衣食住行」。有論者就話喇:唉!喧囂多時嘅政治,竟然排不上市民最關注話題前5位,打破咗好多人嘅認知和想像,有醍醐灌頂之效。阿哥,若然有人仍然執迷不悟,一味要玩嘢搞風搞雨,肯定捉錯用神,落得如荃灣前區議員岑敖暉喺獄中嘅感慨,佢最近喺臉書懷疑自己係唔係「做咗condom」,即係畀民主派同路人用完即棄喎!坐監原來令人生多反思而非更精彩!

講真,香港原本就係一個經濟城市,最緊要係「搵食」,亦即「人人有工開,個個有飯食」,咁就天下太平!「一國兩制」之精髓,老朽認為就係「馬照跑,舞照跳,股照炒」!寫到呢度,今個馬季又結束,心情難免有些少失落!老朽又要等馬季開鑼才可重燃「馬後炮」口舌之快!幸好稍歇個半月,9月睇本報3T常中嘅馬經版,又可重燃「有東方,冇窮人」希望!

香港經過一段時間嘅動盪不安,都係時候回歸經濟民生,政府聚焦為人民服務,一改過去怠政懶散之作風,好似搞環保就唔好「假大空」,藍天白雲唔係吹出嚟嘅!尋日本報又獨家報道「廢竹霸路4星期 環保署話之你」。民生無小事,環保官僚卻懶執法,搞到棄置廢料到處見。見微知著,關注民生,各部門先搞好公共衞生啦唔該!