政情：石禮謙急call 肥老闆開會電話響唔停
為免對會議造成干擾，與會者都應該將電話設定為震機或靜音。之不過尋日嘅立法會大會，唔少議員嘅手機都冇校到靜音，以致整個早上嘅會議，電話鈴聲響個不停，搞到最後主席都忍唔住出聲，提醒各位議員開會麻煩調校靜音啦。
主席出聲 提醒調至靜音
其中議員張華峰（肥老闆）甫發言，電話就開始響，期間嘗試過撳停，但點知就撳唔到，結果整個發言都伴隨住電話鈴聲，恍如配上背景音樂，其音量甚至蓋過咗佢把聲。待佢發言完結，主席梁君彥就提醒各位議員，話今日響好多次啦，大家帶手機入嚟開會一定要校靜音咁話。
之後再問番肥老闆，佢一臉尷尬，解釋當時係黨友石禮謙急Call，想撳停又唔知點解撳唔到，而平時進入會議廳佢都會將部電話調校為靜音，係今日忘記咗，真係唔好意思咁話。