政情：房策目標欠清晰 議員鬧爆似鹹魚

謝偉銓提出議案，建議政府制訂人均居住面積指標，畀港人「住大啲、住鬆啲」，並制訂住屋開支佔家庭入息比例指標，使公私營房屋嘅樓價同租金維持合理水平，以及重組政府架構下嘅房屋、土地及運輸等政策範疇。謝認為政府需要就房屋政策設目標及指標，否則部分官員及部門或會「慢慢做、hea住做」。

3年上樓承諾 兌現無期

柯創盛就指《長策》涉10年或以上嘅房屋策略，但當中未有列入任何一屆政府提出嘅房屋政策目標，令整個房屋政策及相關措施失去方向，政府亦會漏招或走數。佢舉例話，即使政府已達成覓得興建31萬個房屋單位嘅土地目標，惟政府未有將3年上樓承諾納入《長策》，故至今仍難明確表示可兌現承諾。