政情：張宇人挑機 叫考醫生執業試 陳沛然無被拋窒
為紓緩本地醫生人手不足，政府上月向立法會提交修例草案，畀符合特定條件、屬香港永久性居民嘅非本地培訓醫生可以喺香港註冊執業，結果引起唔少爭議。立法會《醫生註冊（修訂）條例草案》委員會尋日開會，支持修例嘅議員張宇人，認為開放外國訓練醫生來港執業，對本地醫生無影響，又指自己問過一啲年齡介乎50至60歲嘅醫生，每一個都話無信心通過現行醫委會嘅執業試，所以呼籲陳沛然等反對修例嘅醫生「你考呢個試畀我睇啊」。面對張宇人點名挑機，陳沛然就回答「夠膽考」喎，係真唔係啊？
陳沛然回應張宇人「會唔會、夠唔夠膽考呢個專業試呢？我可以話你聽，我夠膽考。」佢又話自己準備應考其他國家嘅專業試，強調呢啲一般被業界視為入學試、基本試嘅考核其實唔難，認為醫生一直都有持續進修，即使考一次試過唔到關，考兩次點都過到，強調考試係業界一貫嘅做法。
提到醫委會考核試時，陳就痛斥政府「搬龍門」，指食物及衞生局局長陳肇始喺網誌提到政府設立法定嘅「特別註冊委員會」，訂定非本地認可醫學資格名單數目，由100間大學增至不設上限。食衞局副局長徐德義指修訂並無否定考試需要，只希望增加途徑令海外醫生回港執業，又指政府一向認為海外醫生訓練，要達致與香港兩所大學醫學院訓練嘅醫生質素相若。
盧偉國：專業自主唔等於排斥海外人士
就張宇人批評醫學界嘅專業自主唔應該凌駕大眾利益，陳沛然話按《基本法》，係容許佢哋保留原有嘅專業制度嘅基礎上，自行制訂有關評審各種專業執業資格嘅辦法，專業團體亦可自行審核和頒授專業資格，所以各專業都會自行制訂統一執業資格試，以體現「專業自主」。不過工程界議員盧偉國就反駁話專業自主唔等於排斥海外人士，指香港工程師學會都係受法例規定，本港唯一能批准工程師資格嘅團體，但都有同外國嘅工程師學會組織等互相承認大學學位。