政情：羅健熙跳船 惹黨友不滿

早前開會 未有明確表態

就區議員辭職一事，羅指曾同黨內區議員開會討論咗3、4次，近日傳出較確實消息時又再開會討論，但因各人情況有異，該黨唔會強制區議員黨友作某一決定。佢解釋話唔知消息流言到底有幾準確，加上唔想予人帶頭辭職嘅感覺，左右黨友決定，因此較遲公布辭職決定同通知黨友。佢指下決定前經反覆思量，坦言喺上周四（8日）嘅會議上未有就去留問題作強烈表態，早前曾聽到有黨友不滿為何其態度有所轉變，所以佢打算同對方再次傾談。

至於民主黨有幾多人已經辭任區議員，佢話未掌握到確實人數，相信大部分區議員黨友將會離任。即使面對現時情況，黨友基本上一致認為要堅持政黨身份，唔會考慮解散。

就算已辭職，羅仍認為自己合乎資格，效忠《基本法》及擁護香港特區。至於辭職決定，佢話破產風險非最大考慮，況且「都步入中年，唔係唔可以承受」，雖然預料被DQ需就追薪問題同政府打官司，但佢寧願將資源投放喺地區工作。指政府既然認為區議員身份重要因此必須宣誓，就應清楚公布宣誓細節及進行補選以填補空缺。

儘管羅話無中央或港府官員接觸佢，但曾有自稱「有身份」人士同佢接觸，但難分真假，強調私下溝通亦會反映實況，包括市民對於中央及港府嘅睇法。