政情：陳嘉朗辭職 盼人接租辦公室
政府將於本月內要求區議員宣誓，近日再爆發區議員辭職潮，其中已辭職嘅油尖旺區前區議員陳嘉朗尋日喺Facebook貼文，稱正在關閉議辦時遇上一啲未完嘅合約問題，希望市民可以幫佢接手一啲物品，甚至係接租埋佢個辦事處喎。
尚餘5個月死約
佢需要人幫佢接手嘅有一張4G任用上網SIM卡，228港元一個月，合約到下年3月。另外佢又有一部辦公室用嘅電話同埋fax線仲有1.5年約, 大概每個月200港元都等緊人接手。
接手呢啲SIM卡、電話都係小事，但佢話最好就有人接手租埋個辦事處。佢指辦事處鄰近尖沙咀站出口旁，300呎寫字樓月租15,000元，話可以用作教學或者美容店，包兩部冷氣機、熱水爐，同埋一啲傢俬，又話業主都友善，可以喺今個月底開始進駐，仲有5個月死約咁話喎。咪以為辭任區議員可以話走就走，仲有好多手尾等住佢哋跟呀！