政情：環保署唔管環保 林超英見解獨到
顧名思義，環境保護署就係負責環保事宜嘅政府部門，但天文台前台長林超英就另有見解，指環保署唔負責保護環境。咁到底係邊個部門負責呢？答案竟然係漁農自然護理署！
林超英早前出席一個訪談節目，期間佢提到英國人本來係以「自然」嚟形容生活周遭嘅情況，但由於工業革命搞到生活環境烏煙瘴氣，先至衍生「環保」呢個名詞。之不過「環保」嘅意涵比較狹隘，基本上係講，將污染嘅空氣、污水、垃圾轉移他方，又或者污染物經處理後唔好喺我門口出現，睇唔到就冇問題，佢認為此舉只係着眼於保護人，而唔係真正保護環境。
漁護署先至係護理自然
至於真正保護環境嘅部門，佢認為係漁農自然護理署，因為漁護署嘅任務係護理自然，護理自然先至係真正嘅保護環境。
佢又質疑工業革命改善人類生活嘅講法，話氣候變化不但破壞生態，且會危害到糧食嘅產量。若全球暖化嘅趨勢不變，放眼30年後將有可怕嘅後果，屆時會出現人道救援嘅問題，但到時仲有邊個有能力去做人道救援呢？