政情：怨民政署唔課金 議辦填數 林卓廷需鐵窗廿年薪
因參與去年「35+」民主派初選，而被控涉嫌違反《港區國安法》嘅北區前區議員林卓廷（阿廷），因還押待審而無法履行職務，已於3月31日宣布辭去職務，其辦事處亦隨之關閉，然而其相關開支就高達48,000元。阿廷嘅團隊撳過計數機，按佢目前獄中嘅收入，恐怕佢要坐廿年監，先至夠填呢筆數。
林卓廷團隊尋晚透過社交平台，埋怨民政事務總署拒絕支付任何結束辦事處嘅開支。又指阿廷當日遣散員工、結束辦事處租約等開支，都理應獲得償還。之不過佢哋走去區議會秘書處申索有關嘅開支，但得到嘅答覆係「你自己辭職，我哋唔會理你。」
官司纏身 有排未獲釋
到底條數要點「埋單」呢？阿廷目前只靠獄中工作賺錢嚟支付有關開支，假設佢係在囚人士嘅A級學徒，年薪可得2,412元，而關閉辦事處所需嘅最後一個月租金，加埋議助嘅代通知金合計係48,000元，假設阿廷唔花份薪金一分一毫，都要19.9年嘅獄中收入先至足夠償還。雖然話唔係詛咒阿廷坐廿年監，但佢目前官司纏身，要重獲自由都恐怕唔係短期嘅事。