政情：滙豐申明依法處理 許智峯繼續「𦧲地」
目前被警方通緝、 舊年年底潛逃英國再轉至流亡澳洲嘅前議員許智峯，尋日透過社交平台發表聲明，指滙豐銀行已凍結其戶口逾半年，猶如永久侵吞資產，認為滙豐須公開交代。滙豐發言人回應本報查詢時表示，不能評論相關帳戶嘅事宜，但所有個案嘅處理，滙豐都必需符合當地嘅法律法規。有時事評論員批評許自說自話，若果真係在意戶口被凍結，就應該返港親自處理。
許智峯話，自舊年年底佢同家人嘅滙豐銀行戶口及信用卡被凍結，半年間香港警方並冇就案件嘅調查進度公開任何資料，亦無提供任何證據，無人被拘捕、起訴或通緝，亦冇任何進一步法律程序。許質疑案件是否如警方所指涉「洗黑錢」，甚至違反《港區國安法》，或純粹打壓佢。
許又話，據佢所取得嘅法律意見，凡警方根據《有組織及嚴重罪行條例 》向銀行發出「不同意處理信」（letter of no consent）要求凍結某人戶口，該信嘅有效期不可超過6個月，而如今6個月已過，佢批評滙豐做法明顯違規，猶如永久侵吞私人財產。許反問喺欠缺進一步法律程序下，莫非銀行可以無視合理時限，永久凍結客戶嘅私人財產？許促請滙豐公開交代。
滙豐發言人回應本報查詢，指不能評論相關帳戶嘅事宜，無論喺邊個市場營運，包括許嘅個案處理，滙豐都必須符合當地嘅法律同法規。
自說自話捱批 被促返港跟進
時事評論員陳雲生批評，許智峯多次喺網上要求滙豐公開交代，猶如自說自話，指若果許真係認為滙豐嘅做法違規，理應透過律師辦理相關程序，而唔係單單引述自己所得嘅法律意見。陳又指警方懷疑許涉嫌洗黑錢，但許並無着意澄清，做法不禁惹來公眾質疑，認為滙豐即使唔評論許嘅個案亦能理解。陳又直斥現流亡澳洲嘅許應親自返港處理，定必喺解決戶口凍結問題上有極大幫助。