政情：畢東尼Farewell 同路人送別
政府要求區議員必須宣誓擁護《基本法》及效忠香港特區，連月來都有唔少區議員以不同理由辭職。觀塘區議員王嘉盈日前喺Facebook貼文，話當日係Farewell day，即係歡送日。點解咁講呢？原來王當日上晝開完會後，中午就同觀塘區議員李軍澤、李煒林一齊同前觀塘區議員畢東尼一齊食飯，當係歡送佢。
指身體大不如前退政壇
餐飯得4個人食，唔知同禁聚令有無關係啦，王都直言雖然呢餐飯唔係萬人空巷，但認為當日天氣落住雨亦非常配合離別嘅情懷，令人倍添愁緒喎。王又話人生路漫長，總會有散有聚嘅，所以緣來緣去都係人生必經嘅，最後就祝畢東尼身體健康咁話啦！
畢東尼喺4月中宣布，由於早前係英國滯留咗一段日子，原定於今年1月嘅微創切除組織手術推遲至上月中，而佢都感到身體大不如前，處理地區事務上感到吃力，所以由今個月1日起辭任觀塘區議員一職，並退出香港政壇。