政情：麥美娟獻唱《強》贈義工 話腳頭好 愈跳愈High
工聯會尋日舉行傑出義務工會工作者嘉許禮2020，頒發獎項逾160個。頒獎途中唔知係咪要搞吓氣氛，該會議員陸頌雄、麥美娟、該會會長吳秋北，同埋前議員鄧家彪上台唱歌《強》，又唱又跳咁，仲透露覺得《強》呢首歌好腳頭，唱親都贏喎。
聯同陸頌雄吳秋北表演
佢哋話《強》呢首歌係送畀堅強嘅義工嘅，多謝班義工一直以嚟嘅服務。麥美娟喺唱之前講笑呼籲在場人士着定多啲衫，因為驚佢哋嘅歌聲唔好聽凍親大家咁話喎。一開始麥美娟輕輕搖擺身體，之後動作愈來愈大，又唱又跳，仲要舉起埋手添！
因乜事咁High？唱到一半，麥美娟又開聲講嘢，佢話《強》呢首歌腳頭好，佢由2012年唱到依家，每次唱親都會贏。事後本報再向佢查詢，佢話自從2012年起，該會新界西支部每逢立法會換屆選舉，佢哋嘅義工打氣聚會都會唱呢首歌。