政情：羅致光冧唔掂港青 糟蹋內地企業招聘
本港青年失業情況嚴重，港府今年初就推出「大灣區青年就業計劃」，話要協助本地大學生去內地就業喎。之不過，呢個計劃推出近半年，只得逾300名申請者已入職，佔整體職位空缺僅約10%，好明顯吸引力唔足夠喇！有學者就批評勞工及福利局局長羅致光冇做好前期介紹工作，令年輕人更了解內地情況，相反急住推出計劃，只會帶嚟反效果，減低佢哋去內地發展意欲。佢仲話勞福局喺青年就業方面政策粗疏，冇貼近年輕人嘅需要，所以先搞到年輕人至今仍然好難向上流。
話說羅致光尋日喺網誌話「計劃推出後企業反應熱烈」，截至本月24日，共有超過370間企業提供超過2,800個職位空缺，當中約半是創科職位。喺便利港人在廣東養老工作方面，羅就指香港有兩間非政府機構早於10幾年前，分別喺深圳同肇慶營辦兩間安老院舍，港府現時正資助145名合資格香港長者入住上述兩間院舍喎。佢仲提及唔少經常喺廣東等內地城市生活嘅港人，好大機會想「在粵」退休，局方希望有更多香港模式營運嘅優質安老院，喺呢啲內地城市落戶。
稅制醫療保障有異 港府欠配套
既然羅講到大灣區有咁多發展機遇，又指唔少喺內地港人想喺該地退休，一班年輕人又係咪真係受落呢？單講「大灣區青年就業計劃」成效，香港理工大學專業及持續教育學院講師陳偉強就認為有關入職數字偏低，相信唔單止同年輕人唔夠踴躍參與有關，亦有可能因內地同香港稅制同醫療保障唔同，內地公司仲未準備好安排港青入職，質疑政府或未有提供足夠配套。
陳又話本地年輕人對國情了解唔夠，過去有案例見到年輕人去內地工作幾個月後，就感到意興闌珊，甚至發現自己同內地文化格格不入，減低未來到內地工作意欲。佢認為政府喺推行計劃前，應該加強年輕人對內地文化了解，包括法律問題。至於本港青年就業問題一直未能解決，佢就認為同香港產業過於單一化，只側重於金融同地產有關，唔少大學生畢業後都搵唔到適合工作，導致人力資源錯配問題日趨嚴重，認為政府應該正視同處理呀！