政情：新同盟解散保平安

新同盟尋日傍晚6點以「緣起緣滅．有聚有散」為題，喺Fb宣布即日解散。貼文提到，香港社會喺過去兩年急劇變化，政治環境大不如前，有前黨員喺《港區國安法》實施後身陷牢獄至今，加上當局即將安排區議員宣誓，形容該黨成員因各自不同考量選擇退出、離開或留下。該黨又話，喺變幻環境中唔能夠再拘泥於過去嘅包袱，形容不論係咪喺同一組織之內，都可以繼續同民主派同路人合作發聲。

近月已爆發「退黨潮」

查實政圈早前一度傳出新同盟會解散，且近月爆發「退黨潮」，具區議員身分嘅黨員由去年初嘅19人，大減至解散前只剩8人，連帶新同盟近期動向亦趨沉寂，其Fb專頁超過一個月冇再更新，最近一次已經係上月24日，但亦只係轉載牽涉去年民主派「35+」初選案、正被還押嘅前議員范國威宣布退黨同退出政壇。

曾簽「墨落無悔」聲明書

至於觸發今次解散嘅決定，據講係由於今個月中，政界傳出3條DQ「紅線」，指所有曾參與去年民主派「35+」初選、借出議員辦事處作票站，又或者簽署「墨落無悔堅定抗爭」抗爭派立場聲明書者，一律冇得留低。由於新同盟曾以政黨名義簽署「墨落無悔堅定抗爭」聲明書，政圈相信該黨所有區議員會皆被DQ，故再次引發黨內討論係咪需要解散。

據了解，黨內成員對於保留或解散該黨嘅投票結果相近，但傾向解散嘅人較多，事關部分成員希望藉此「保平安」，即使無人確保解散後必然安全，但始終相信「做咗好過唔做」。

到底依家先至「割席」仲嚟唔嚟得切？相信要待政府月內安排宣誓後，屆時公布DQ名單先至一清二楚。之不過，與其事後不斷擔心會唔會被DQ，甚至可能因無力歸還薪津而淪為破產收場，點解當日唔「停一停、諗一諗」呢？