政情：范國威還押 時刻體驗無冷氣日
因參與去年民主派「35+」初選，涉嫌違反《港區國安法》，被控串謀顛覆國家政權罪嘅前議員范國威，目前於荔技角收押所還押待審。雖然范早前講過自己已適應鐵窗生活，但就不時想起佢嘅前黨友兼前區議員譚凱邦。事關主張環保嘅譚，年年都舉辦無冷氣夜活動，如今范身陷囹圄，正好每天體驗無冷氣日喎。
天氣炎熱 諗起譚凱邦
尋日范國威透過社交平台回覆外界來信，當中提到天氣漸趨炎熱，令佢經常想起譚凱邦，因為譚有份創立環保組織以及舉辦一年一度嘅無冷氣夜活動。但依家范身處荔枝角收押所，日日都變成無冷氣日。
其實譚凱邦亦因涉「35+」初選案，現時被羈押於赤柱監獄。主張唔開冷氣嘅譚，耐熱程度亦比較高。過往譚曾分享有助炎夏入睡嘅招數，包括睡前一小時沖涼、風扇直吹張床鋪、以及瞓喺竹蓆或藤蓆之上。不過監房嘅生活條件唔同咗，譚可能要另想降溫方法啦。