阿健︰「總之我聽朝要見到份文件喺枱面！（好勞氣咁收線）」
阿康︰「你面色好似好差咁喎，啱啱同邊個傾電話啊？」
阿健︰「公司接咗一單大Project（項目），呢排壓力都好大。啱啱下屬同我講話份文件出咗問題，唔能夠及時畀到個客，我就忍唔住話咗佢兩句。我都知呢排好躁底，夜晚一諗起公司嘢就瞓唔着，所以咪約你出嚟跑吓步，放鬆吓囉。」
阿康︰「緊張工作唔係唔好，但如果攪到個人成日都好煩躁，經常坐立不安，夜晚又瞓唔好，就有機會影響到自己同身邊同事嘅精神健康！」
阿健︰「吓，咁點算啊？」
阿康︰「只要你識得保持『正面思維』、『享受生活』同『與人分享』就會有改善㗎啦！」
阿健︰「聽落好似好簡單，但實際上要點做呢？」
阿康︰「首先，『正面思維』係指凡事要向好方面諗，例如唔好諗今日仲有幾多目標未完成，相反可以總結一吓自己完成咗嘅任務，從而建立自信心！」
阿健︰「『享受生活』就好似依家咁，同你一齊出嚟跑吓步，呼吸吓新鮮空氣，培養唔同嘅興趣？」
阿康︰「冇錯啦！至於『與人分享』，就係指同身邊嘅人建立同維持關係，嘗試多啲體諒同讚賞同事，咁可以有效提升工作動力同信心㗎！仲有，如果有壓力就記得搵朋友傾訴吓啦！即係我啊！哈哈。」
阿健︰「同你傾完真係舒服好多，等陣跑完我請你食個Tea啦！」