政情：蔡澤鴻刪社交網站帳戶 網民：唔好畀人知你走佬
泛民主派鳥獸散，有唔少人士流亡海外，至於好多留喺香港嘅人就等踎監。觀塘區議會主席蔡澤鴻突然宣布刪除個人社交網站帳戶，引起外界猜測佢準備「走佬」，仲有網民直言「唔好畀人知你走佬呀」！
此地無銀惹猜測
蔡澤鴻前日喺個人Facebook帳戶貼文，同大家交代將會刪除帳戶，有事可以透過工作用嘅「蔡澤鴻議員辦事處」專頁聯絡佢。佢仲同大家講再見，但係又戴頭盔話唔係「走佬」喎。不過，網民似乎認為係此地無銀三百両，有人留言話「唔好畀人知你走佬呀！」仲有唔少人紛紛叫佢保重，祝佢萬事小心、平安。成個氣氛好似真係離別咁，我哋都聯絡過蔡澤鴻，但截稿前未有回應。仲見到蔡嘅個人帳戶喺個人簡介寫住「走這麼遠，就是要到天涯，會一會那個自己！」唔通佢真係有計劃去其他國家會一會自己？