政情：政府科技鴻溝 乏支援基層配套
喺疫情下，唔少學校都曾轉為網上授課，但部分基層學童因為家庭條件唔理想，缺乏上網器材及網絡而影響學習進度。有科技界人士就話政府過去推出支援措施時都「太謹慎」，擔心會成為長遠開支、加重負擔，但佢就認為如果政府有適切方法解決基層家庭面對嘅困難，唔單止可以收窄科技鴻溝，亦有助推動本地智慧城市及數字經濟嘅發展。
洪為民倡公屋裝無線網絡 減家庭負擔
互聯網專業協會榮譽會長、科創義工聯盟發起人洪為民尋日出席活動時話，喺疫情下唔少基層家庭生活困苦，唔單止未能應付上網費用，小朋友亦會喺屋企爭電腦使用，佢哋好難要求政府可以有針對性咁協助所有家庭。佢又話政府喺硬件配套上應該要做得更好，例如曾建議喺公共屋邨安裝無線網絡設施減輕基層家庭負擔，相信成本唔算好高，而興建過渡性房屋時都應該要一併考慮。
見到唔少基層家庭嘅慘況，佢話科技愈先進，引伸出嚟嘅貧富懸殊問題就愈嚴重，所以義工聯盟希望透過同地區組織合作，提供更「貼地」嘅專業服務，包括協助家庭維修電腦，提供獲捐贈嘅上網電話卡及電腦等，令基層弱勢群體唔會因為家庭環境，而影響喺資訊社會競爭力。