政情：張可森還押 怕肥唔敢食朱古力
屯門前區議員張可森因參與舊年民主派「35+」初選，涉違反《港區國安法》被控串謀顛覆國家政權罪，現還押喺赤柱監獄。有現任區議員日前曾經去探望佢，問起佢仲使唔使攞啲朱古力畀佢時，佢即刻拒絕，話怕食肥喎。
涉違《港區國安法》
張可森喺2月底被還押，兩名現任屯門區議員朱順雅同曾振興日前去監獄探佢，朱喺社交網站貼文引述張同曾喺會面時交代咗一啲公事之後，就滔滔不絕咁講近況，雖然只有15分鐘時間，但都傾得好開懷。曾仲講笑咁問張仲要唔要幫佢入啲朱古力，張即刻話：咪了！會吃肥！你哋幫吓手食啲啦……唔該」，3人隨即相視而笑。
議辦3月關門大吉
其實張可森係喺還押中辭去屯門區議員一職，並於5月11日生效，而佢嘅議員辧事處則早喺3月底結束，據悉係其一眾議員助理嘅安排。
據了解，張嘅助理曾向民政事務處查詢，能否繼續報銷辦事處租金，但冇明確答覆，所以決定先關閉辦事處，以免日後唔能夠報銷。