政情：預咗成為定罪人士 朱凱廸努力適應坐監
因參與去年民主派35+初選，涉嫌觸犯《港區國安法》嘅前議員朱凱廸，目前喺赤柱監獄還押待審。前議員邵家臻尋日探望過朱，事後邵引述朱嘅說話，指朱正努力適應坐監生活，預備由還押人士轉為定罪人士身份。照咁講法，佢對自己所面對嘅控罪審訊，似乎已經打定輸數。
其實朱凱廸早前已預計會有一段長時間失去自由，佢喺上個月宣稱不再參政，同埋結束「新西團隊」。朱目前正被6宗刑事檢控纏身，包括參與民主派初選涉違國安法被控顛覆國家政權罪。
用盡一小時「放風」曬太陽
雖然已經有心理準備，但牢獄生活始終難捱，所以朱每日會用盡一小時嘅「放風」時間曬太陽，希望令膚色再黑一啲，預備由還押人士轉為定罪人士身份喎。佢依家睇歷史書消磨時間，仲建議其他還押待審嘅朋友，不妨閱讀有助自己平靜嘅靜修書。
佢又話具體感覺到懲教署正着手改善監房酷熱問題，3樓嘅倉房亦都加裝滾筒扇嘞！