政情：未宣誓再爆退黨潮 公民黨1日10區議員割席
有消息指政府計劃喺下月安排現任區議員宣誓擁護《基本法》及效忠香港特區，參與去年民主派「35+」初選、借出議員辦事處作票站，及曾簽署「墨落無悔」聲明書等，最少3個行為料被列入「負面清單」，涉事區議員將被褫奪議席（DQ）。公民黨尋日有至少10名區議員宣布退黨，再加上離島區議員容詠嫦上周已退黨，令區議員人數由16人大減只剩5人。
人數大減 只剩5人
傍晚約6點起，觀塘區議員王嘉盈、沙田區議員陸梓峂及麥梓健、身兼執行委員會成員嘅葵青區議員張鈞翹、深水埗區議員劉家衡及李俊晞、油尖旺區議會副主席余德寶、荃灣區議會主席陳琬琛同區議員陸靈中及離島區李嘉豪，喺Facebook宣布已退出公民黨。另外，該黨九龍西支部主席温仲然以私人理由決定退黨，並辭去黨內一切職務，即時生效。
陸梓峂貼文話雖然加入該黨嘅時間唔長，但亦感謝該黨支援同照顧，相信聚首終有期。張鈞翹就話大學一年級入公民黨實習，至今已7年，中間曾離開又返嚟，佢話現時政黨之路寸步難行，所以決定退黨，又話已喺早前提出退黨通知，希望以後作為獨立民主派議員繼續行落去。劉家衡就形容退黨決定沉痛且艱難。
喺2019年區議會選舉中，公民黨取得33個議席，成為民主派喺區議會中第二大政黨，但自舊年有黨員被取消參選立法會議員資格後，該黨已爆發退黨潮，而早前政圈盛傳，當時以政黨名義簽署「墨落無悔」聲明書嘅公民黨，喺宣誓後所有區議員料會「全數陣亡」。