政情：前行人專區保留天眼 私隱署：冇收集個人資料
旺角西洋菜南街、即係前行人專用區嘅閉路電視系統（天眼）清拆與否爭議多時，民政事務處喺今年1月完成檢討報告，決定保留天眼系統。有唔少區議員擔心天眼會侵犯市民嘅私隱，仲去信個人資料私隱專員公署，但私隱署近日就回信話天眼不涉及收集個人資料，所以無牴觸《個人資料（私隱）條例》喎。
稱天眼無特定目標
油尖旺區議會早前去信私隱署，詢問天眼有否牴觸《個人資料（私隱）條例》，私隱署話天眼無特定目標，只會拍攝到行人嘅頭頂，天眼都無具備錄影功能，因此唔符合條例中個人資料嘅定義，即係需要從資料中確定有關人士嘅身份同埋資料予以查閱。
對於區議會都問到警方有冇就天眼一事曾經詢問私隱署，私隱署就話政府部門不時都會諮詢佢哋，私隱署都會畀意見，所以唔會評論個別諮詢喇！唔知班區議員對私隱署嘅回覆收唔收貨，睇嚟如果佢哋繼續要拆天眼嘅話，就要再諗吓方法喇！