政情：企街站變餵蚊 顏汶羽斥部門卸責 難改善衞生
雖然政府年年都話撲滅蚊患，但每逢潮濕多雨嘅春夏兩季，蚊患都特別惱人。觀塘區議員顏汶羽早前去屋邨企街站，結果就變相去咗「餵蚊」。佢話現時不同政府部門，各自劃地為界嘅環境衞生工作，難以有效對付蚊患，因為「蚊係識飛o架」！
顏汶羽指出，香港嘅環境衞生欠佳，情況令人搖頭，無論滅蚊、滅鼠、清理垃圾及掃街洗地等，幾乎每日都被市民批評。佢話主要原因係政府並無將工作集中同統籌，食環署、路政署、房屋署、康文署等部門，各自劃地為界，各自為政。亦曾經有出席區議會會議嘅部門代表話：「蚊係識飛o架！」，暗指其他部門嘅工作不到位，以致蚊蟲老鼠走咗入自己部門嘅界線內。
蟲鼠四圍走 促港府集中處理
其實蚊識得飛，老鼠亦會四圍走。顏汶羽舉例指，當甲部門委託承辦商進行環境衞生工作，蚊蟲老鼠自然會走去乙部門嘅範圍躲避，而當乙部門着手滅蟲鼠，乙部門嘅蟲鼠又會轉往丙部門嘅地方匿藏，如此循環往復，事倍而功半，又點可能解決問題呢？所以佢主張，但凡涉及公眾地方嘅環境衞生，應該集中由一個部門處理，先至可以進行有效嘅防蚊控鼠策略。