政情：「耆樂警訊傳愛心」 一哥鄧炳強落區向長者派福袋
警方尋日舉辦「耆樂警訊傳愛心 2021」活動，警務處處長鄧炳強及警務處副處長（行動）蕭澤頤出席開展禮，向有需要嘅長者派發福袋。因應疫情，福袋加入防疫物品如口罩同酒精搓手液，代表耆樂警訊同市民攜手抗疫。同一時間，全港22個警區人員及耆樂警訊會員亦喺各區進行派福袋活動。
心繫社會 宣傳防騙及交通安全
此外，兩架耆樂警訊「滅罪活力號」宣傳車亦隨即走訪全港各區，將提防騙案同交通安全嘅訊息傳遞至長者社群。鄧炳強喺開展禮上表示，「耆樂警訊傳愛心」向有需要嘅長者派發福袋，表達警隊對佢哋嘅關懷，同時深入接觸更多長者，了解佢哋嘅需要，令警隊更有效同長者建立緊密互信嘅夥伴關係，畀佢哋感受到警隊「心繫社會」嘅信念。
開展禮後，鄧炳強同蕭澤頤分別到西區西環邨，以及九龍城區樂民新邨探訪長者同派發福袋。耆樂警訊計劃於2014年推出，旨在向長者宣揚防罪、滅罪、家居及道路安全訊息，並提供一個平台畀長者參與有意義嘅活動以及繼續服務社會。截至上月，耆樂警訊計劃嘅會員已超過1.2萬人。