政情：規劃不善 車位不足 郭偉强鬧爆運房局

設智能停車場 進展緩慢

郭偉强提到，去年高達270萬張「牛肉乾」嘅違泊罰款告票，雖為政府庫房帶來逾10億元進帳，但單靠抄牌其實係解決唔到問題，停車位不足先係違泊問題嘅真正主因，但政府從不認真解決問題。至於運輸署推展嘅智能停車場，到依家都係進展緩慢，耍太極，多個智能停車場項目，只有荃灣海盛路項目已完成招標，杯水車薪，未能解決泊車位不足問題。

倡調節車輛數目紓擠塞

郭批評，泊車位不足係整體規劃落後所致，佢認為運輸及房屋局首先要清楚掌握，現時道路可以承載幾多車輛，要有目標咁調節整體車輛數目，佢仲話不時都聽到唔少做生意嘅司機抱怨，話賺唔到錢，因為塞車都已經虛耗咗大量時間！郭又指，知道局方有做嘢，例如近期上調私家車首次登記稅及牌費等，但認為呢啲都只係細眉細眼嘅工夫，不足以應付大局。

此外，郭認為長遠而言，政府應該要打散商業核心區。佢解釋，現時商業區主要都集中喺港島及九龍，呢啲地區泊車位不足問題特別嚴重，加上市民跨區工作要「南下北上」，揸車返工進一步惡化泊車問題。當局應做好規劃，如果可以做到本區就業，泊車問題就能迎刃而解！不過，泊車問題唔係最近先有，想唔想解決問題都要睇政府有冇心去做，如果冇心去做，幾多或者幾好嘅建議，都當係耳邊風，繼續置之不理，市民就繼續受苦啦。