政情：官員開會遊花園 怒火谷爆謝偉銓
唔知係咪政府工夠穩陣，以致一眾官員做事都得過且過呢？議員謝偉銓（Tony）都認為官員表現不濟，話佢哋出席會議經常答非所問、不斷重複大家老早就知道嘅內容，甚至答覆前後矛盾！即使係講緊審議幾十億、以至幾百億嘅撥款項目，向立法會提交嘅文件並唔足夠。Tony仲嬲到去信政務司司長張建宗，投訴官員嘅表現，督促政府正視問題，提升官員喺立法會嘅答問水平啊！
Tony喺上星期五（11日）去信投訴，提到有關情況屢次發生，尤其喺近期多個委員會嘅討論中，都發現出席官員唔能夠直接回應議員提問，簡直浪費寶貴嘅議會時間，妨礙立法會以及公眾有效監察政府政策。佢又認為，如果官員真係冇辦法即場解答議員嘅提問，大可以如實告知，唔應該信口開河或者遊花園囉。
空郵中心工程撥款捱轟
唔單止答問質素有問題，Tony仲向記者大吐苦水，話好多時喺事務委員會嘅討論時間好短，但係上到財務委員會，官員就好似當咗項目已經傾完，冇提供足夠資料，亦忽略冇參與事務委員會嘅議員。再者，官員唔應該恃住福利項目，企喺道德高地就奉旨攞到錢，強調議員係要為整個香港嚟考慮啊。尤其係以直接注資形式，而並非以傳統工務工程方式推展嘅工程項目，最常出現討論文件流於表面嘅情況。佢舉例指近期重建香港郵政空郵中心，獎券基金注資等幾十億、甚至幾百億元嘅工程同撥款。而有關項目正正牽涉長期被外界批評嘅香港郵政同埋勞工及福利局！睇嚟有關官員真係要痛定思痛喇！
有關信件由立法會內務委員會主席轉交畀張建宗，Tony敦促政府採取措施，提升官員喺立法會嘅答問水平同埋提交文件嘅質素，確保公帑可以用得其所之餘，立法會亦可以有效監察喇。內會主席喺尋日嘅會議上交代已經向政務司司長轉達信件同意見，對方話會跟進有關事宜喎。Tony就期望官員可以有理有據、以理服人，若果冇改善就唯有每次開會再𥄫實官員。佢又形容自己係「問題議員」，睇嚟一班官員真係要醒定啲喇！