政情：退休近兩周 王冬勝避談感受
滙豐非執行主席王冬勝可謂銀行界嘅「老行尊」，佢喺2005年加入滙豐銀行，不知不覺已度過16個寒暑，由2010年起擔任滙豐亞太區行政總裁至今已11年，上周一（7日）退休並轉任非執行主席。退休近兩個星期，王尋日出席一個記者會時就被問到，退休後有咩感受，但佢就話呢個場合唔回應私人嘢喇。
任職滙豐時屢捲入政治漩渦
王冬勝在任期間，曾經捲入唔同嘅政治漩渦，例如滙豐因涉及華為事件，以致多次遭到內地傳媒批評，但王就要擔起同內地部門溝通嘅責任。王舊年更因為簽名支持《港區國安法》，而畀美國等西方國家抨擊。
王退休後轉任非執行主席，接替退任嘅滙控非執行董事史美倫，同時亦會擔任滙控主席杜嘉祺同祈耀年嘅顧問。