政情：趙柱幫座駕泊街 一晚啃4張牛肉乾
幾乎每個駕駛人士，都收過俗稱「牛肉乾」嘅定額罰款告票。沙田區議員趙柱幫，日前喺社交平台大吐苦水，話說佢將自己部7人車泊街過夜，翌日發現被抄牌，有4張違例停泊嘅告票，跟住佢又話，座駕嘅車頭有張由房屋署發出嘅沙田區議員泊車證，懷疑有人玩針對咁話喎。
稱疑被針對 網民反駁
趙柱幫並無詳細交代抄牌嘅位置，只係話周二晚佢將部座駕停泊喺沙田工廠區某條街，而附近亦都有車輛單線停泊。趙堅稱自己泊車嘅位置並非巴士或小巴站，且對交通並無構成阻塞，但估唔到喺周二晚9點、周三凌晨3點、清晨7點同9點，一夜之間竟抄咗4次牌，懷疑自己遭到針對，因為車頭有張由房屋署發出嘅沙田區議員泊車證喎。趙嘅「陰謀論」一出，好快就有網民反駁話唔關事，相信警察唔會咁得閒去針對區議員；有人指工廠區嗰邊本來就抄得好犀利，有人試過7小時之內抄咗6張；亦有人話警察收到違泊投訴就要做嘢。
趙柱幫覺得一晚4張告票唔公平，其實可以到中央交通違例檢控組投訴。但正如有啲網民留言話啃「牛肉乾」，養車就預咗啦！同埋有人主張，都係乖乖哋畀錢入停車場啦。