政情：結束議辦 找數差20萬 劉珈汶「賣文」籌旗
早前話唔想完成無理嘅宣誓要求，而喺今個月9日辭職嘅黃大仙前區議員劉珈汶，尋日喺社交平台貼文，話發現結束辦事處嘅開支，以及遭到民政事務處抽起嘅開支申領，金額將近20萬元！佢希望大家可以訂閱佢嘅網上文章，隨緣樂助咁話。
指遭民政處抽起開支申領
劉珈汶嘅貼文指，自己辭任區議員後，屈指一算先至發現結束辦事處嘅支出，同埋遭到民政處抽起嘅開支申領，計落都將近20萬元。佢話同在囚或者流亡嘅民主派人士相比，自己「未夠格」去懇求大眾嘅財政支持，但20萬元呢筆數對佢嚟講都算係燃眉之急，所以希望大家可以隨緣樂助，「細力」支持吓佢。
佢又話自己從小都喜愛寫作，所以都希望藉網上嘅收費平台，同大家分享一啲佢嘅興趣同埋軼事，仲透露其私生活亦會曝光。睇番平台上劉珈汶開出嘅價目，最貴嘅訂閱收費為每月155元，如果要籌集20萬，起碼都要有過千名讀者支持先至得，唔知佢嘅文章能否吸引咁多網民訂閱，幫補吓佢啲使費呢？