政情：鄭家朗網上蒲頭閃逝 行蹤依然成謎

翻查鄭家朗嘅社交網站，舊年12月佢向服刑中嘅前香港眾志成員周庭隔空慶生，佢當時分享合照，提到生日實在講唔出快樂，只願大家唔好被政權嘅打壓所摧殘，又話願周庭一切安好喎。不過自從該貼文後，鄭家朗事隔差唔多半年，到上個月尾先轉發新聞。其後又再冇晒聲氣，到尋日突然接連轉載3個新聞貼文啊！睇嚟外界都察覺到動靜，有網民隨即留言問「你喺邊，好掛住你」，仲有其他網民讚好留言喎。不過鄭家朗並冇回覆，睇嚟都係要保持神秘感，準備隨時再玩失蹤？

翻查資料，鄭家朗目前仲有一案在身。事緣，海關喺舊年5月接獲舉報，指眾志出售嘅口罩懷疑附有虛假產地以及效能聲稱，而商戶經多番要求下，一直未能夠對所供應嘅口罩標示聲稱提供證明，因此以涉嫌違反《商品說明條例》拘捕鄭家朗等人，佢哋其後獲准保釋候查，案件至今仍調查中。

羅冠聰走佬 黃之鋒踎監

原眾志核心成員可謂鳥獸散，前主席兼前議員羅冠聰最早鬆人，早喺《港區國安法》生效之前就離港赴英，當時有傳羅嘅同行人士仲包括鄭家朗添。而前眾志秘書長黃之鋒、主席林朗彥以及周庭，涉前年6月21日包圍灣仔警察總部，而被控未經批准集結中認罪，去年被判刑，而林同周已經先後喺今年4月同6月刑滿出獄，不過都唔見鄭家朗現身為佢哋洗塵，又或者喺網上有所表示喎。

至於黃之鋒就仍然踎緊監，皆因佢涉及去年民主派「35+」初選而被控觸犯《港區國安法》，早前仲同探監人士話預計喺佢30幾歲時先可以同大家再見添。咁樣搞法，唔知一班眾志成員喺有生之年仲有冇機會重聚呢？