政情：憶童年獲派公屋展歡顏 劉國勳姚銘嘆置業難

姚銘憶述自己讀幼稚園嘅時候係住板間房，3個小朋友逼埋喺一張帆布床瞓覺，但幸好後來獲派公屋，居住環境稍有改善，後來家人再抽到居屋，以七、八十萬購入單位，先至有一種安定落嚟嘅感覺。依家姚銘作為兩女之父，都要努力儲錢置業，期望為兩位千金提供更舒適嘅居住環境。

解決住屋問題 要睇政府點覓地

劉國勳就話自己童年係同家人住喺唐樓當中嘅一間分租房，至今都記得裏面有一個公共客廳同公用廚房，但妹妹出生後不久就獲派公屋，後來父母把握政府推出租者置其屋計劃嘅機會，購買自己居住嘅公屋單位。劉國勳回想上一輩人，置業未必係人生目標之一，但依家社會唔同咗，就算租住公屋都面對入息上限等不確定因素。至於私樓實在太貴，要圓置業夢並唔容易。況且不論公、私營市場，樓宇面積愈來愈狹窄，所以姚同劉兩人都覺得，要長遠解決住屋問題，增加土地供應始終係治本之道。