還押近10個月 快必瘦15磅 家人唔信咁少

生唇瘡頭瘡 靠天然療法自愈

快必喺社交平台話自己好耐都冇試過除晒衫照鏡，上星期一照鏡覺得自己上半身瘦晒，笑稱係向戰俘身材邁進，先兩日磅重發現輕咗15磅，得番150磅。而佢嘅家人反而感到驚訝，因為覺得佢瘦咗咁多，竟然都只係輕咗15磅咋。快必就解釋話自己有保持做運動，肌肉紮實咗。佢屋企人就笑稱最重要係塊臉瘦咗，有番條頸。

雖然體形瘦咗，但快必皮膚狀況就麻麻地喇！佢之前生唇瘡，身體出紅色粒粒，頭頂又有頭瘡。佢話唇瘡就用天然療法等佢自己好番，至於其他嘅紅色粒粒，就搽咗醫生畀嘅藥膏，都覺得好有效。不過，佢話收押所翳焗，衞生環境又差，好番之後都會好快又再生番，之後再搽藥膏好番，不停重複呢個過程喎。