屈麥美娟撐暴力 朱凱廸 黃偉賢拖兩年突道歉
於2019年爆發的反對修訂《逃犯條例》示威，當時各大陣營都有假消息流出，導致社會嚴重撕裂。其中議員麥美娟（Alice）就喺當年8月入稟高等法院，民事控告民主黨元朗區議員黃偉賢同正被還押嘅前議員朱凱廸誹謗，話兩人誣衊佢喺一個典禮上支持元朗鄉民使用非法暴力。之後Alice向兩人發律師信要求佢哋公開道歉，但就未獲回應。之但係事隔近兩年，黃及朱尋日突然公開刊登道歉聲明認錯，究竟發生咩事呢？
黃及朱尋日喺報章刊登共同聲明，話兩人分別喺2019年7月中及下旬，先後喺網絡電台節目及社交平台引述內容，指Alice喺前年7月18日屏山鄉事委員會就職典禮上，發言稱讚元朗鄉親成功驅趕示威者，又稱佢形容示威者係「曱甴」。黃喺聲明中就話，當時因記錯Alice喺典禮上所講嘅言論，而向公眾及傳媒引述錯誤內容。
黃稱記錯內容 朱轉述言論
至於朱因參與上年民主派「35+」初選，涉違反《港區國安法》，被控串謀顛覆國家政權罪而正被還押，佢喺聲明中都承認，喺無求證黃引述嘅言論係咪屬實下，就喺社交平台專頁製作圖像及宣傳單張，轉述失實言論同廣泛發布，誣衊Alice，兩人對於事件嚴重影響到對方聲譽而致歉。
Alice尋日朝早喺Facebook（Fb）上載道歉聲明截圖，佢回應查詢時就話，案件本來已經喺高院排期聆訊，佢同律師都做好準備。但月前對方主動提出和解，佢哋經多番討論，就得出目前嘅和解協議，至於具體內容就不便透露喇。對於兩人事隔兩年先道歉，佢就形容係「遲來嘅道歉」，但終於可以取回公道，仲多謝兩年嚟支持佢嘅朋友。
有議員問攬炒派幾時道歉？
見到黃同朱終於道歉，Alice嘅黨友、勞工界議員陸頌雄都喺Fb分享貼文，話攬炒派喺2019年有數之不盡嘅謊言同假見證，對社會已經帶嚟難以彌補嘅創傷，質疑遲咗兩年嘅道歉係咪仲係真誠，又反問攬炒派幾時先會為鼓吹縱容黑暴，而真心道歉同反省。議員郭偉強都戥Alice唔抵，話兩人道歉只係因為畀人告到「甩褲」，仲話如果唔想香港變成「假資訊苦主中心」，就要盡快立法打擊假資訊，制止黑暴及外部勢力嘅陰招喎。