政情：遊人湧入泥灘 余漢坤籲手下留蜆
疫情下嘅香港，好多郊野地區都湧現「留港度假」嘅市民。離島區議會主席余漢坤日前拍片，並邀來世界自然基金會香港分會海洋保育主任蘇隽彥，指出近年多咗市民到大嶼山水口村「打卡」同掘蜆，擔心會對當地嘅自然生態帶來傷害。
余漢坤話佢童年時嘅水口村約有1,000名居民，後來只剩200人左右，但最近水口村又因遊人湧入而恢復熱鬧，之不過唔少遊人到此嘅目的，係到泥灘掘蜆。蘇隽彥就話上個月，水口村嘅泥灘就試過有接近500人掘蜆，若果每個掘蜆人士攞走100隻蜆，一日內差不多有5萬隻蜆被攞走。
倡備保育尺 勿捉BB蜆
余話呢個數字頗為嚇人，於是呼籲市民，若然真係要一過掘蜆癮的話，除咗避免使用大型工具，亦應準備一把蜆類保育尺，如所掘到嘅蜆能通過保育尺上同雞蛋大小相若嘅窿，咁就係蜆BB，一定要留番喺水口村。不過就算隻蜆已「成年」，亦應按知足常樂嘅精神，勿過量掘取。兩人又提醒掘蜆人士須留意潮水漲退，預留充足時間執拾同離開，但最重要係不留下垃圾，免得造成海洋垃圾問題。