政情：蔡冠深： 後生仔做嘢追求成功感
雖然社會上係有聲音，嫌時下嘅後生仔唔夠長進，不過商會名譽會長蔡冠深就唔係咁睇，佢話港人年輕一代醒目、有創意，又認為年輕人發展事業，最緊要開心同埋獲得成功感，就算唔係乜嘢鴻圖偉業或者賺大錢，都會義無反顧。
蔡冠深以自己嘅掌上明珠為例，話佢同好多香港後生仔一樣充滿創意。因應鍾意整蛋糕嘅興趣，囡囡與同伴合夥發展糕餅嘅生意，做得開心之餘，仲能夠賺錢添。蔡又話剛喺英國大學畢業嘅21歲細仔蔡展思（Jason）都勇於嘗試，跟佢一齊往內地舉辦青創計劃。至於Jason跟爸爸做嘢又係咪興趣所在呢？佢坦言並非百分百有興趣，不過凡事都要試吓，只要有意義，唔係古板枯燥，就值得一試咁話。
蔡又指自己去年11月卸任商會會長後，依舊相當忙碌，過去3個月都身在內地，為商會推行區域性合作，加上內地疫情控制得唔錯，就算一周內往返3個城市，完全不受影響！