政情：易過搞明日大嶼 梁福元叫修例發展祖堂地
政府早前運用《收回土地條例》收回新界3幅土地，當中牽涉祖堂地，引起社會關注祖堂地的發展去向。十八鄉鄉事委員會前主席梁福元日前就喺Facebook貼文，指本港建屋困難，但即使政府開展「明日大嶼」計劃亦遠水不能救近火，認為政府應善用新界土地，以合理條件發展祖堂地。
面積達2400公頃
實際上，新界鄉議局早前都對政府收地表示關注。梁話依家好多祖堂地因為業權人眾多、意見不合、已移民或已離世等原因，難以根據法例需提交100%嘅業權人同意先能出售或發展，以致香港覓地建屋困難。佢形容開展「明日大嶼」計劃遠水不能救近火，而本港大約有7,300幅祖堂地，面積達2,400公頃，仲大過明日大嶼計劃填海嘅1,700公頃。若政府修訂過時法例，以合理條件去發展祖堂地，相信必然比人工島更加快捷便利。佢又希望當局急市民之所急，調整政策以改善香港住屋不足嘅問題，唔好令土地荒廢，以致物無所用，教人惋惜啊！
