政情：「將我寫老晒」鄒幸彤呼冤
支聯會副主席鄒幸彤因涉嫌宣傳六四非法集結，上周五（4日）被警方以違反《公安條例》為由拘捕，於荃灣警署扣留調查至前日（5日）下午保釋離開，一個月後回警署報到。點知鄒尋日再喺社交平台上「呼冤」，原來係話大家都將佢嘅年齡寫大咗，稱自己唔係1984年出生喎。
鄒幸彤尋日喺Facebook貼文話要嚴正公告，指自己唔係1984年出生嘅，仲問「做乜個個都將我寫老晒？」 多名網民留言，有人話記得鄒的確好似唔係1984年出生，亦有人留言話「邊個叫你（鄒幸彤）比同屆啲人細一年」，另外都有網民問「咁即係邊年出世啫？」。不過，即使「群情洶湧」，但鄒幸彤都係冇解釋番自己究竟幾多歲。
疑似36歲 澄清唔清唔楚
翻查網上資料，寫住鄒幸彤喺1984年1月24日出生，即係現時37歲。而鄒幸彤Facebook嘅個人資料中，有寫佢於1996年開始入讀英華女書院，如果好似網民所講鄒比同屆嘅人細一年，咁鄒今年應該係36歲，比網上資料顯示嘅年齡細一年咁囉！既然要澄清，佢應該自己講清楚喇！