政情：行醫濟世看淡富貴 陳家亮不忘苦日子

指艱難歲月令人成長

陳家亮就話杏林中人，不宜有高高在上嘅想法，即使今日飛黃騰達，佢都唔會忘記自己出身於草根，況且醫療界所面對嘅巿民大眾，好多都係貧苦階層，若果忽視佢哋身處嘅狀況，或忘卻自己微時嘅苦困，咁就未必能夠實踐服務大眾嘅理想。講起過去嘅艱難日子，陳就憶述佢就讀中大醫學院嘅往事。

話說當年嘅中大醫學院係新開辦，作為教學醫院嘅沙田威爾斯醫院尚未落成，於是要改去聯合醫院上課。但礙於聯合醫院規模有限且欠缺教學設施，惟有喺醫院外面設置幾個貨櫃箱，內裏放置床同枱椅，既作為導修課嘅場所，亦係醫學生休息嘅地方，雖然學習條件欠佳，但醫學院要求好高，大家都搏命讀書，唯恐成績追唔上要重讀，然而就喺咁艱難嘅開始，先至令人成長得更加堅強，而師兄弟嘅關係亦如同家人咁融洽。